Naxçıvan Muxtar Respublikasındakı apteklərdə həm bəzi dərmanları tapmaq çətinləşib, həm də qiymətlər orta hesabla iki dəfə bahalaşıb. “Gündəlik Naxçıvan” yazır ki, ən çox bahalaşan dərmanlar əsasən antibiotik qrupuna aid olanlardır.
Bahalıq və qıtlıqdan narazı olan yerli sakinlərin dediyinə görə, xəstə yaxınları dərman ala bilmək üçün Bakıya getməyə, ya da qonşu ölkələrə səfər etməyə məcbur qalırlar.
Şərur rayon sakini Kamil Vəliyev deyir ki, davamlı aldığı “Aspirin Kardio” iki dəfədən artıq bahalaşdığından qohumları bu dərmanı Bakıdan alıb, ona göndərir:
Naxçıvanda kifayət qədər əczaxana var ancaq, axtarılan dərman vasitələri çox zaman tapılmır, ya da baha qiymətə olur. İnsanlar məcbur qalıb, əvəzedicilərindən istifadə edirlər. Onlar da çox vaxt uğun gəlmir. Ürəyimdən əməliyyat olmuşam. İki ildir müxtəlif dərmanlardan istifadə edirəm. Onların da qiyməti qalxıb. Məsələn, daim istifadə etdiyim “Aspirin kardio”nu həmişə 4.30 manata alırdım, indi 10 manata qaldırıblar. Bir dəfə alanda, büdcəyə çox təsir etməyə bilər. Mən isə, hər gün qəbul etməliyəm bu dərmanı. Ona görə də, qohumlardan xahiş etmişəm, Bakıdan alıb göndəriblər.
Kamil Vəliyev
Culfa rayon sakini Mürsəl Hacıyevin sözlərinə görə, həkimin onun üçün yazdığı dərmanların əksəriyyəti apteklərdə olmadığından Türkiyəyə üz tutmalı olub:
Dərmanlar təcili lazım idi deyə, özüm Türkiyəyə getdim. Əksəriyyəti Naxçıvandakı apteklərdə yox idi, olanlar da çox bahadır. Məsələn, Türkiyədən 7 manata aldığım bir antibiotik Naxçıvanda 40 manata satılır. Bu səbədən çox adam Türkiyədəki qohumlarından xahiş edir ki, oradan alıb göndərsinlər. Bu, vaxt aparsa da xeyli ucuz başa gəlir.
Mürsəl Hacıyev
“Gündəlik Naxçıvan” yazır ki, ötən ilin sonlarına kimi Naxçıvanın dərman təchizatını o vaxtkı hakim ailə, Talıbovlara məxsus “Nəqşicahan MED” MMC həyata keçirirdi. Vasif Talıbovun istefasından sonra ailənin əksər şirkətləri kimi bu MMC də yeni rəhbərliyin nəzarəti altına keçib. Bundan sonra MMC-nin fəaliyyəti zəifləməyə başlayıb. Hazırda isə iflas ərəfəsində olan şirkət işçilərinin əksəriyyətini ixtisar edib, yerdə qalanların maaşını ödəmək üçün isə, maliyyə tapa bilmir.
