Rusiya Ermənistandan gələn yük maşınlarının ölkəyə girişinə qadağa qoyub. Bu qadağaya “sanitariya qaydalar pozulması” iddiası olub.
Beləcə 23 noyabrdan bu yana Gürcüstan – Rusiya sərhədində çoxlu sayda yük maşını növbəsi yaranıb.
Bazar ertəsi Ermənistan Parlamentinin müxalifətdə olan deputatı Qarnik Danielyan bəyan edib ki, artıq bir neçə yük maşını Ermənistana geri qayıdıb. O deyib ki, “təxminən 200-ə yaxın başqa maşın növbə gözləyir”.
Sərhəddə yük maşınları ilişib qalan “Rose Field” şirkətinin nümayəndəsi “Hetq” saytına açıqlamasında deyib ki, Rusiya “Ermənistanı iqtisadi cəhətdən sıxışdırmağa çalışdığı üçün yük maşınlarının ölkəyə girişini qadağan edir.” Şirkət nümayəndəsi bunu “Ermənistanın siyasi xəttini dəyişməsi” ilə izah edib.
Yük maşınlarında nə var?
Yük maşınlarının Ermənistanın Rusiyaya əsas ixracat məhsullarından olan meyvə, tərəvəz, çiçək və balıq daşıdığı ehtimal edilir. “Hetq” yazır ki, Rusiyanın Ukraynaya genişmiqyaslı müdaxiləsindən sonra Ermənistanın Rusiyaya ixracı kəskin artıb, çünki Rusiya əvvəllər Qərbdən gələn tədarükləri əvəz etməyə çalışır.
Rusiya gömrükçüləri “Rose Field” şirkətinə deyiblər ki, yük maşınlarının buraxılmaması əmri “Moskvadan gəlib”.
Rusiya mediası isə yazır ki, Yuxarı Lars yolunda hava şəraiti ucbatından hərəkət məhdudlaşıb. Nəticədə isə 2600-ə qədər yük maşından ibarət növbə yaranıb.
Bazar günü Ermənistanın Dövlət Gəlirləri Komitəsi bəyan edib ki, “vəziyyəti nizamlamaq üçün müntəzəm müzakirələr aparır”.
Müxalifət kimi günahlandırır?
Ermənistandan olan yük maşınlarının Rusiyaya buraxılmaması xəbəri yayılandan dərhal sonra parlamentin müxalif qrupları günahın Nikol Paşinyanda olduğunu səsləndirməyə başlayıb.
Onlar baş verənləri Paşinyanın Kollektiv Təhlükəsizlik Müqaviləsi Təşkilatının (KTMT) iclaslarını rədd etməklə əsaslandırıblar.
“Düşünürəm ki, Rusiya [Yerevana] müəyyən mesajlar göndərir”,
“Ermənistan Alyansı”nın müxalifətçi deputatı Artur Xaçatryan “AzadlıqRadiosu”na belə deyib.
O əlavə edib ki, Moskva Paşinyanın noyabrın sonunda Minskdə KTMT-nın sammitində iştirak etməmək qərarına cavab verir.
Ermənistanın Rusiya ilə münasibətləri 2020-ci ildə İkinci Dağlıq Qarabağ Müharibəsindən sonra sürətlə pisləşib. Rəsmi Yerevan özünü Moskvanın rəhbərlik etdiyi KTMT və Müstəqil Dövlətlər Birliyindən uzaqlaşdıraraq Qərblə daha sıx əlaqələrə üstünlük verir.
Bu yazı OC Media ilə əməkdaşlığın tərkib hissəsidir. Mətnin orijinalını ingilis dilində buradan oxuya bilərsiniz.
