“Apardığımız araşdırmalar nəticəsində Bayıl yamacındakı tikililərin təqribən 20-25 %-in ötən əsrin 60-70-cı illərində, qalanlarının da 1990-2000-ci illərdə qeyri-qanuni, 1 gecəyə tikildiyi müəyyən edilib. Sakinlər bu evləri qanunsuz olaraq tikib. Lakin bütün bunlara baxmayaraq, bu gün dövlətimiz ayrı-seçkilik etmədən orada yaşayan insanların hər birinin qayğısına qalır”. Bunu APA-ya Səbail Rayon İcra Hakimiyyətinin başçısı Eldar Əzizov deyib.
İcra başçısının sözlərinə görə sürüşmə nəticəsində vətəndaşlara məxsus 4 fərdi ev tam, 1-i isə qismən dağılıb.
“Bayılda baş verən sürüşmənin səbəbləri barədə tam dəqiq söz demək, münasibət bildirmək hələ tezdir. Ancaq mütəxəssislərin ilkin rəyinə görə, sürüşmə aktivliyi torpağın daxilində baş verən proseslərlə əlaqədardır. Sürüşmə təbii prosesdir. İnsanlar öz fəaliyyətləri ilə bu prosesin sürətlənməsinə az da olsa təsir edə bilərlər. Təhlükəli sahə hesab olunan ərazidə yerləşən tikililər 1 mərtəbəli, plansız, bünövrəsiz 1 gecəyə tikilən zəif evlərdir”.
- Fevralın 10-da Bayıl yamacında sürüşmə baş verib. Sürüşmədən əvvəl sakinlər ərazidən çıxarıldığından xəsarət alan olmayıb.
- Evləri yararsız hala düşən vətəndaşlar 163 nömrəli məktəbdə yaradılan sığınacaqda məskunlaşıblar.
- Hazırda Bayıl yamacındakı sürüşmə aktiv fazadadır. Sürüşmə sahəsində 30 metr uzunluğunda, 12 metr dərinliyində çatlar yaranıb.
