Azərbaycan 2016-cı ildən ölkədə keçirilən Formula 1 yarışları ilə bağlı təşkilatçılarla danışıqlar aparacaq. Azərbaycanın Gənclər və İdman naziri Azad Rəhimov TASS agentliyinə deyib ki, kontrakt uzadılmamışdam şərtlərin yaxşılaşdırılmasını istəyirlər.
“Grand Prix-dən üç ay sonra Formula 1 rəhbərliyinə kontraktı 2025-ci ilədək uzadıb uzatmamaq barədə qərarımızı bildirməliyik. Hamı anlayır ki, mövcud kontrakt qəbuledilməzdir. Məncə, Formula 1-in yeni rəhbərliyi də bunu anlayır. Bir sıra kommersiya şərtləri, sponsorluq haqları, ödədiyimiz qiymətdən danışırıq”, – Azad Rəhimov deyib.
Nazir vurğulayıb ki, onun fikrincə həm Azərbaycan, həm də Formula 1 rəhbərliyi yarışın Azərbaycanda keçirilməsini istəyir.
Azərbaycan 2016-cı ildən “Formula-1” Grand Prix yarışlarını təşkil edir.
Təşkilat Komitəsi ilə imzalanan sazişə görə, Azərbaycan 2017-ci ildən sonra daha 3 il bu yarışları keçirməlidir. Azərbaycan rəsmilərinin sözlərinə görə, əks halda, razılaşmaya əsasən, ölkəni 50 milyon dollar cərimə gözləyir.
Yarışların təşkili ilə bağlı Formula 1 rəhbərliyi ilə imzalanan müqavilənin detalları ilə bağlı ictimaiyyətə açıqlama verilməyib. Nazir Azad Rəhimov bunu kommersiya sirri olmağı ilə əsaslandırıb.
Ölkə müxalifəti isə bu yarışların Bakıda keçirilməsinin əleyhinədir. Onlar deyirlər ki, beynəlxalq yarışların təşkilinə ayrılan pullar xalqın ehtiyaclarına sərf edilməlidir.
