Prezidentinin İctimai-siyasi məsələlər üzrə köməkçisi Əli Həsənov Azərbaycanla korrupsiya əlaqələrində ittiham olunan AŞPA-da Avropa Xalq Partiyası deputatlar qrupunun sabiq sədri Luka Volonte barədə İtaliyanın Milan məhkəməsinin bəraət qərarını şərh edib. Əli Həsənov hesab edir ki, anti-Azərbaycan mərkəzlər və şəbəkələr çoxsaylı feyk-məlumatlarla həm Azərbaycan dövlətini, həm də Azərbaycana dost münasibəti bəsləyənləri qınaq obyektinə çevirmək istəyirlər:
“Təsadüfi deyil ki, həmin vaxt OCCRP-nin “Azərbaycanın pulyuyan maşını” adlı qondarma materialı dünya mediasında sürətlə tirajlandı, məsələ ilə ayrı-ayrı ölkələrin rəsmi instansiyaları maraqlandı və orada adları keçən şəxslər, o cümlədən də guya Azərbaycandan 2 milyon 640 min dollar almış AŞPA-da Avropa Xalq Partiyası deputatlar qrupunun sədri olmuş Luka Volonte barədə xüsusi araşdırma başladıldı”. – deyə Ə.Həsənov vurğulayıb.
Adıçəkilən araşdırmanın yayımlandığı vaxt açıqlama yayaraq iddiaların qərəzli, əsassız və təxribat xarakterli olduğunu bəyan etdiklərini deyən Ə.Həsənov əlavə edib ki, Milan məhkəməsinin qərarı da bunu təsdiqləyib:
“Milan məhkəməsinin 2018-ci il 13 fevral tarixli qərarı ötən ilin ortalarında məlum anti-Azərbaycan mərkəzlərin və şəbəkələrin sifarişi ilə Mütəşəkkil Cinayətkarlıq və Korrupsiyaya Qarşı Jurnalistika Layihəsi (OCCRP) adlı qeyri-şəffaf və bəlli məqsədlər üçün yaradılmış qurum vasitəsilə yayılmış məlumatların əsassız, qərəzli olduğunu və Azərbaycanın sağlam beynəlxalq imicini ləkələmək məqsədi güddüyünü təsdiqləyib”.
Prezidentin köməkçisi həmçinin onu da qeyd edib ki, Azərbaycan hakimiyyəti Milan məhkəməsinin qərarı ilə kifayətlənmək niyyətində deyil:
“Biz bu çirkin əməldə əli olanlarla bağlı müvafiq qaydada hüquqi prosedurlara başlamaq niyyətindəyik. Məsələ ilə bağlı artıq Azərbaycanın aidiyyəti dövlət orqanlarına tapşırıqlar verilib. Hesab edirik ki, demokratiya və söz azadlığı pərdəsi altında gizlənərək beynəlxalq miqyasda ayrı-ayrı dövlətlərə, qurumlara, şəxslərə qarşı kampaniya təşkil edənlər bunun məsuliyyətini də dərk etməli və cavabdehlik daşımalıdırlar”.
