Azərbaycanın 9 milyard dollar xarici borcu var

Maliyyə Nazirliyi Azərbaycanın xarici borcu ilə bağlı məlumat yayıb. Məlumatda bildirilir ki, bu il yanvarın 1-nə olan məlumata görə, Azərbaycanın xarici dövət borcu 9398,3 milyon dollar təşkil edib. Borc manatla ifadədə 16 milyarda yaxındır.

Xarici dövlət borcunun beynəlxalq maliyyə institutlarından infrastruktur layihələri və maliyyələşmə proqramlarından ötrü cəlb edilmiş kreditlərdən, həmçinin, beynəlxalq maliyyə bazarlarında yerləşdirilən qiymətli kağızlardan ibarət olduğu bildirilir.

Nazirlik xarici dövlət borcunun Ümumi Daxili Məhsula (ÜDM) nisbətinin 22.8 faiz olduğunu bildirir. 2017-ci il üzrə hesablanmış ÜDM-nin məbləği isə 70135,1 milyon manat olub.

Xarici borca hökumətin birbaşa öhdəlikləri və dövlət zəmanətilə cəlb edilmiş kreditlər üzrə şərti öhdəlikləri daxil edilib.
Ötən ilin ortalarında açıqlanan bilgilərə görə, Azərbaycanın 2017-ci ilin iyul ayına xarici dövlət borcu 12208,5 milyon manat (7172,6 milyon dollar) olub.

Xarici dövlət borcunun Ümumi Daxili Məhsula (ÜDM-ə) nisbəti isə 18.9 faiz idi. İllik müqayisədə xarici dövlət borcu 4 milyard manata yaxın artıb.