“Avropa İttifaqı ilə Azərbaycan arasında yeni saziş üzrə danışıqların növbəti mərhələsi bu ilin birinci rübünün sonuna və ya ikinci rübünün əvvəlinə planlaşdırılır”. Bunu Azərbaycan xarici işlər naziri Elmar Məmmədyarov “RİA Novosti”yə müsahibəsində deyib. APA-nın məlumatına görə, nazir Nazir Aİ ilə Azərbaycan arasında viza məsələsinə də toxunaraq deyib ki, hazırda bu məsələ viza rejiminin sadələşdirilməsi və readmissiya sazişinə görə tənzimlənir: “Biz hesab edirik ki, bu saziş əsasında əldə edilmiş nailiyyətlər viza rejiminin liberallaşdırılması sahəsində də yeni imkanlar açır”.
Nazir Azərbaycanla Avropa İttifaqı arasındakı əməkdaşlığın Rusiya ilə münasibətlərə təsir etmədiyini vurğulayıb: “Bizim hər hansı əməkdaşlıq layihəsində iştirakımız digər tərəfdaşların maraqlarına zidd ola bilməz. Belə bir məqsəd və ya niyyət yoxdur. Rusiya ilə Azərbaycan arasında strateji tərəfdaşlıq Avropa İtifaqı ilə əlaqələrə təsir etmədiyi kimi, Aİ ilə də əlaqələrimiz Rusiya ilə Azərbaycan arasında strateji əhəmiyyət daşıyan dostluq münasibətlərinə təsir etmir. Azərbaycan qonşuları, xüsusilə də Rusiya ilə strateji tərəfdaşlıq münasibətlərinin inkişafına böyük önəm verir”.
Müsahibəsində üçtərəfli görüş məsələsinə də toxunan E.Məmmədyarov bildirib ki, Azərbaycan, Ermənistan və Rusiya xarici işlər nazirləri arasında üçtərəfli görüşün keçirilməsi ilə bağlı hələlik plan yoxdur.
