Foto: Turan

Azərbaycan “Formula 1” yarışlarının təşkilindən 277, 3 milyon dollar gəlir əldə edib. Bu barədə “PricewaterhouseCoopers” beynəlxalq audit şirkətinin hesabatında məlumat verilib. Oxu.az-ın xəbərinə görə, hesabat Bakıda 2016-cı ilin iyununda baş tutmuş ilk Formula-1 yarışından bu günədək olan müddətdə Qran-Priyə ev sahibliyinin faydalarının iqtisadi qiymətləndirilməsini əks etdirir.

Hesabatda göstərilən yekun məbləğ yarışlar ərəfəsində Formula-1 ilə əlaqədar Bakıya gələnlərin xərcləri əsasında yaranmış birbaşa və dolayı gəlirləri əhatə edir.

Məsələ ilə bağlı “Bakı Şəhər Halqası” Əməliyyat Şirkətinin marketinq və kommunikasiya departamentinin rəhbəri Nigar Arpadarai bilidirib ki, bu rəqəmə Formula-1 ilə əlaqədar Bakıya gələn qonaq və yarış iştirakçılarına mehmanxana, restoran və nəqliyyat istiqamətləri üzrə təqdim olunmuş məhsul və xidmətlər, həmçinin bu məhsul və xidmətlərlə birbaşa əlaqədə yaranmış digər gəlirlər daxildir.

Üçüncü Azərbaycan Qran-Prisi 27-29 aprel tarixlərində keçiriləcək.