“Ölkələrin daxili işlərinə qarışmağın əsas yollarından biri də seçkilərdir. Bizi istəməyənlərə də ölkəmizdə seçkilərin yüksək səviyyədə keçirildiyini qəbul etdirməliyik”.
APA-nın məlumatına görə, bunu Mərkəzi Seçki Komissiyasının (MSK) dairə seçki komissiyalarının sədrləri üçün təşkil etdiyi seminar-müşavirədə çıxış edən MSK sədri Məzahir Pənahov deyib.
Azərbaycanda MSK-nın böyük nüfuzunun olduğunu deyən sədr seçkilərin demokratik, şəffaf keçirilməsi üçün əsas şərtin ictimai-siyasi sabitlik olduğunu və Azərbaycanda ictimai-siyasi sabitlik mövcudluğunu vurğulayıb.
M. Pənahov bildirib ki, Azərbaycanda dairə seçki komissiyalarına Avropa və Asiya üçün nümunə olacaq şərait yaradılıb: “Azərbaycanda bu sahədə işlər nümunəvi təşkil edilib. Ancaq standartlar dəyişir, hər zaman aşağı seçki komissiyalarının fəaliyyəti təkmilləşməlidir. Çalışmalıyıq ki, Azərbaycanda keçirilən seçkilər ölkədən kənarda da yüksək qiymətləndirilsin. Mübarizənin ən aktual cəbhəsi seçkilərdir”.
M. Pənahov həm də bu günlər ərzində namizədliyi irəli sürülmüş şəxslərin sayının 13 olduğunu açıqlayıb və MSK indiyə qədər 5 nəfərin prezidentliyə namizədliyinin irəli sürülməsini təsdiq edib.
