İnsan hüquqlarının müdafiəsi üzrə məşhur beynəlxalq qurumlar cümə axşamı ABŞ Administrasiyasını, habelə Konqres üzvlərini Azərbaycanda həbs edilmiş jurnalistləri və digər siyasi məhbusları müdafiə etməyə çağırıb. Onların azad edilməsi çağırışı ABŞ Konqresinin Freedoms Project kimi məşhur olan təşəbbüsü çərçivəsində səslənib, bu barədə Turan İnformasiya Agentliyi məlumat yayıb.
İnsan Hüquqları Komissiyası çərçivəsində dinləmələrdə çıxış edən Freedom Now-nun Vaşinqtondakı direktoru Melina Milatso Azərbaycanda vicdanın səsi olmaq məsələsinə baxmaq xahişi ilə komissiyaya müraciət edib.
2012-ci ildə işə salınmış Freedoms Project layihəsi Konqres üzvlərinin ağır vəziyyətdə olan konkret vicdan məhbusları ilə həmrəy olmağa və onlara ictimai dəstək verməyə imkan yaradır. Bundan başqa, konqresmenlər onların azad edilməsi üçün beynəlxalq diqqət və dəstək də cəlb edə bilərlər.
Komissiyanın həmsədri, konqresmen Ceyms Makqovern öz çıxışında söz verib ki, qanunverici həmkarları bütün dünyada vicdan məhbuslarının unudulmaması üçün vəziyyəti “izləyəcəklər”.
