Bayıl yamacında sürüşmə ərazisində 106 yaşayış evi üçün sürüşmə təhlükəsi var. Bunu Ekologiya və Təbii Sərvətlər Nazirliyinin (ETSN) Milli Geoloji Kəşfiyyat Xidmətinin geoloji planlama ekspedisiyasının rəisi Əziz Qaralov. O, APA-ya açıqlamasında bildirib ki, Bayıl dərəsinin sağ yamacı konturlaşdırılıb. Sürüşməyə meylli ərazinin konturları daxilində, sürüşməyə meylli kütlənin üzərində 106 fərdi yaşayış evi var. Bayıl yamacında sürüşmə ərazisinin 6,9 hektar ərazini əhatə etdiyini xatırladan ekspedisiya rəisi bildirib ki, sürüşmə sahəsində 5 – 6 gün öncə müşahidə olunan vəziyyət hökm sürməkdədir: “Kütlənin üzərində araşdırma aparmaq, çatların eni və uzunluğunu ölçmək bu gün üçün mümkünsüzdür. Yağış yağıb, təbii olaraq ərazidəki kütlə ağırlaşıb. Sürüşmə sahəsində stabilləşmədən söhbət gedə bilməz. Proses davam edir”.
Ə. Qaralov qeyd edib ki, ərazidə böyük miqyasda, dəqiq geoloji işlər aparmağa ehtiyac var: “Yəni, bütün layları təşkil edən süxurların vəziyyətini öyrənmək, hansı ev nəyin üzərində tikilib, bütün bunları hər tərəfli tədqiq etmək lazımdır. Hətta hər bir evin yerləşdiyi ərazi haqda müəyyən məlumatlar da vermək mümkündür”.
