Suriyanın şimalında kürd birləşmələrinə qarşı hərbi əməliyyatlar başlayandan Türkiyədə terrorçuluğun təbliğində şübhəli bilinən 800-dək adam saxlanıb. Türkiyə Daxili İşlər Nazirliyinin məlumatına görə onlardan 600-ə yaxını sosial şəbəkələrdə Ankaranı tənqid etdiyinə görə, digərləri isə etiraz aksiyalarında iştirakdan sonra saxlanıb.
Polis sosial şəbəkələrdə 1300-dək hesabın təhlilini aparıb. Bundan sonra hakimiyyət 400-dək cinayət işi açıb. Bunu isə Anadolu informasiya agentliyi yazıb.
- Ankara Suriyanın şimalında “Zeytun budağı” əməliyyatına başlayıb. Türkiyə buradakı kürd birləşmələrini terrorçu hesab edir. Kürd yaraqlılar ABŞ-ın rəhbərlik etdiyi koalisiyanın tərkibində İslam Dövləti (İŞİD) qruplaşmasına qarşı savaşır.
- Kürdlərin nəzarətində olan ərazilərdə bir neçə yüz amerikalı hərbçi yerləşdirilib. Vaşinqton dəfələrlə Ankaranı Suriyanın şimalında “təmkinli olmağa” çağırıb.
- Afrin regionunda əməliyyatı tənqidə görə saxlananlar arasında tanınmış türkiyəli jurnalistlər və fəallar da var.
