Azərbaycan baş prokuroru Zakir Qaralav ukraynalı həmkarına “Turan” televiziyasının əməkdaşı Fikrət Hüseynlinin ekstradisiyası ilə bağlı məktub yazıb. Niderland vətəndaşlığı almış F.Hüseynli barədə yazılan məktubun surəti Ukraynanın İnsan Hüquqları haqqında İnformasiya Mərkəzi nəşrinin əlində var.
2018-ci il yanvarın 12-də yazılan məktubda Zakir Qaralov deyir:
“Onun təhvil verilməsi haqqında qərar qəbul edilməsinin gecikdirilməsi bizdə narahatlıq hissi doğurur, belə ki, o və onun “müdafiəçiləri” ədalətli mühakimədən yayınmaq üçün hər cür tədbirə əl atırlar. Bundan başqa, həm Azərbaycanda, həm də onun hüdudlarından kənarda onun aldatdığı, fırıldaqçı əməllərindən zərər çəkmiş insanların hüquqları pozulur”.
Baş prokuror həmkarına bildirir ki, Fikrət Hüseynlinin Ukraynaya ölkədə sabitliyi pozmaq üçün gəldiyi və mitinqlərdə və Ukraynanın milli maraqlarına zidd olan digər siyasi tədbirlərdə iştirak etdiyi “səhih faktlarla müəyyən edilib”.
Amma onun məhz hansı dinc mitinqlərdə iştirak etdiyi dəqiq qeyd olunmayıb. Məktuba qoşmada o, Fikrət Hüseynli və Saakaşvilinin birgə ağ-qara şəklini də əlavə edib. Digər əlavə isə “Komsomolskaya pravda”dan “feyklərin ortaya çıxması üçün Azərbaycan hakimiyyəti ilə əməkdaşlıq edən haqqin.az” nəşrinə” istinad olunan materialdır.
Baş prokuror həm də gileylənir ki, F.Hüseynlinin Ukrayna XİN vasitəsilə ekstradisiyası məsələsinə baxılması prosesinə qərb ölkələrinin səfirliklərinin bir sıra məmurları müdaxilə edir. Hansı ölkədən söhbət getdiyi isə yenə də dəqiq qeyd olunmur.
İnsan Hüquqları haqqında İnformasiya Mərkəzi bildirir ki, fevralın 19-da Kiyevin Peçerski rayon məhkəməsi ikinci dəfə Fikrət Hüseynlinin işi üzrə iclası təxirə salıb.
- Fikrət Hüseynli Azərbaycanda müxalif “Azadlıq” qəzetinin əməkdaşı olub.
- 2006-cı ilin martında Bakının Badamdar qəsəbəsində maskalı naməlum şəxslər onu oğurlayıblar və döyüblər, nəticədə o, ağır bədən xəsarətləri, o cümlədən bıçaq yaraları alıb. 2008-ci il mayın 8-də jurnalist Azərbaycandan mühacirət edib. O, Niderlandda qaçqın statusu alıb və hazırda bu ölkənin vətəndaşıdır.
- 2017-ci il oktyabrın 14-də Ukrayna sərhədçiləri Azərbaycanın sorğusu əsasında Hüseynlini “Borispol” aeroportunda saxlayıblar. O, Kiyevə “Turan TV” peyk telekanalının filialını açmaq üçün gəlmişdi.
