ATƏT-in Demokratik Təsisatlar və İnsan Haqları Bürosunun (DTİHB) Ehtiyacların Dəyərləndirilməsi Missiyasının nümayəndə heyəti bu gün, prezidentliyə namizəd İlham Əliyevin səlahiyyətli nümayəndəsi, YAP-ın sədr müavini Əli Əhmədovla görüşüblər.
Bu barədə YAP mətbuat xidməti məlumat yayıb.
Görüşdə Əli Əhmədov Yeni Azərbaycan Partiyasının aprelin 11-də keçiriləcək prezident seçkilərinə hazırlıq işlərindən bəhs edərək, seçkilərin ədalətli və şəffaf keçiriləcəyinə əminliyini ifadə edib. Nümayəndə heyətinin rəhbəri, ATƏT/DTİHB-in Seçki Departamentinin rəhbəri Aleksandr Şlik görüşdən məmnunluğunu bildirərək, qurumun Azərbaycanda seçkilərə maraq göstərdiyini ifadə edib.
- ATƏT-in Demokratik Təsisatlar və İnsan Hüquqları Bürosunun (DTİHB) qiymətləndirmə missiyası fevralın 21-dən Azərbaycanda səfərdədir.
- Missiya Azərbaycanda seçkiqabağı vəziyyəti öyrənmək məqsədi ilə gəlib.
- Onlar fevralın 21-i Mərkəzi Seçki Komissiyasında (MSK) olublar. MSK sədri Məzahir Pənahov və digər komissiya təmsilçiləri ilə görüşüblər. Verilən məlumata görə, MSK təmsilçilərindən Azərbaycanın seçki sistemi, seçki komissiyalarının fəaliyyət prinsipləri, seçici siyahılarının dəqiqləşdirilməsi, növbədənkənar seçkiyə hazırlıq məsələləri ilə bağlı məlumat alıblar.
