Azərbaycan prezidenti İlham Əliyev Vəkillər Kollegiyası üçün bina ayrılması barədə sərəncam imzalayıb. Sərəncam ölkədə məhkəmə-hüquq sisteminin təkmilləşdirilməsi və müasirləşdirilməsi sahəsində görülən işlər çərçivəsində vəkilliyin inkişafına dəstək vermək məqsədilə imzalanıb. Prezidentin rəsmi saytının yaydığı sənəddə qeyd olunur ki, Vəkillər Kollegiyasının Rəyasət Heyəti və digər strukturlarının fəaliyyətinin təmin edilməsi məqsədilə onun Bakı şəhərində müvafiq bina ilə təmin olunması üçün Nazirlər Kabineti iki ay müddətində tədbirlər görsün.
Eyni zamanda regionlarda apellyasiya məhkəmələrinin, ağır cinayətlər məhkəmələrinin və inzibati-iqtisadi məhkəmələrin yerləşdikləri Gəncə, Lənkəran, Sumqayıt, Şəki və Şirvan şəhərlərində Azərbaycan Respublikası Vəkillər Kollegiyasının vəkil qurumlarının fəaliyyətinin təmin edilməsi məqsədilə onların müvafiq binalarla (yerlərlə) təmin olunması da nəzərdə tutulur.
Sərəncamın digər bəndinə əsasən dövlət hesabına hüququ yardıma görə verilən məbləğ 3 dəfə artılırsın. Bundan başqa Nazirlər Kabinetinə o da tapşrılıb ki, Vəkillər Kollegiyasının maddi-texniki təminatı üçün tədbirlər görülsün, Kollegiyanın istifadəsində olan binaların təmiri, zəruri kompüter avadanlığının və digər avadanlığın, habelə nəqliyyat vasitələrinin alınması məqsədilə vəsait ayırılsın.
Sənədin ikinci bəndində Vəkillər Kollegiyasına tövsiyə edilir ki, ixtisas imtahanları vasitəsilə Kollegiyaya yeni üzvlər qəbul edilsin, vəkillərin peşə hazırlığının və ixtisasının artırılması ilə bağlı zəruri tədbirlər görsün, peşə standartlarına riayət edilsin, hüquqi yardım üçün müraciət etmiş şəxslərə münasibətdə vicdanlı və nəzakətli davranış tələblərinə ciddi riayət etmələrini təmin etsin.
Sənəddə hüquqi məsləhətə ehtiyacı olan aztəminatlı şəxslər üçün Vəkillər Kollegiyasının pulsuz hüquqi xidmətlər göstərməsi, kollegiyanın fəaliyyətində şəffaflığın artırılması və ictimaiyyətlə əlaqələrin daha da genişləndirilməsi ilə bağlı tədbirlər görməsi və “Elektron məhkəmə” informasiya sisteminə inteqrasiyası istiqamətində tədbirlər görülməsi nəzərdə tutulur.
