Moskvada kinoteatrlardan birində ölkədə nümayişi qadağan olunan “Stalinin ölümü” komediyasının nümayişi cərimə ilə nəticələnib. Kinoteatr rəhbərliyi buna görə 100 min rubl (1750 dollar) məbləğində cərimələnib.
Rusiyanın Mədəniyyət Nazirliyi ötən ay Britaniya istehsalı olan bu komediyanın kinoteatrlarda göstərilməsini qadağan edib. Amma xarici filmlər üzrə ixtisaslaşmış “Pioner” kinoteatrı qadağayla bağlı rəsmi bildiriş almamışdan öncə filmi göstərib, polis reydindən sonra da yayımı dayandırıb.
Fevralın 22-də Moskvada məhkəmə belə bir qərar çıxarıb ki, kinoteatrın sahibi olan Chentromobile-Pioner şirkəti rəsmi qadağanın ziddinə gedərək filmi nümayiş etdirib.
Kinoteatr təmsilçiləri filmi rəsmi bildirişdən öncə yayımladıqlarını bildiriblər.
Rusiyanın mühafizəkar xadimləri filmdə Rusiya tarixinin ələ salındığını bildirir.
