Milli Turizm Təbliğat Bürosu, Bakı Nəqliyyat Agentliyi və “PASHA Travel” şirkəti arasında Bakı şəhərinin rəsmi şəhər kartını yaratmaq məqsədilə memorandum imzalanıb. Memorandumu bu gün Milli Turizm Təbliğat Bürosunun direktoru Fuad Nağıyev, Bakı Nəqliyyat Agentliyinin (BNA) baş direktorunun müşaviri Mübariz Abbasov və “PASHA Travel” şirkətinin əməliyyatlar üzrə baş direktoru Florian Sengstschmid imzalayıb.
APA-nın xəbərinə görə, Milli Turizm Təbliğat Bürosunun direktoru Fuad Nağıyev qeyd edib ki, bu layihənin əhəmiyyətli tərəfi odur ki, turistlərlə bağlı statistik məlumatların əldə oluna biləcək: “Biz bu kart vasitəsilə turistlərin hansı obyektləri ziyarət etdiyini öyrənəcəyik və çatışmazlıqları aradan qaldıracağıq”.
Kartı əldə edən turistlər nəqliyyatdan istifadə edə biləcək və muzeylərə girişdə, mağazalarda endirimlər qazanacaq.
“Baku Card”, Azərbaycanda ilk və yeganə Bakı şəhərinin rəsmi şəhər kartıdır. Kart sahibləri pulsuz ictimai nəqliyyatdan, şəhər muzeyləri və mədəniyyət mərkəzlərinə ödənişsiz və ya endirimli girişdən istifadə edəcək. Bundan əlavə, “Baku Card” sahibləri mağazalar, kafelər, restoranlar və daha çox müxtəlif yerlərdə endirimlər və xüsusi təkliflər əldə edə biləcəklər.
24 saatlıq “Baku Card” 35 manat, 72 saatlıq “Baku Card” 60 manat və 1 həftəlik “Baku Card” 90 manata olacaq.
