İran prezidenti Həsən Ruhani ifrat mühafizəkarların universitetlərin islamlaşdırılmasına dəstəyini tənqid edib. Prezident deyib ki, İslam riyaziyyatı, fizikası və ya kimyası, yaxud islami avtomobil sənayesi yoxdur.
Azadliq Radiosu xəbər verir ki, Tehranda 31-ci Beynəlxalq Xarəzmi Elm Festivalında çıxış edən H.Ruhani vurğulayıb ki, dini institutlara böyük həcmdə pul xərcləməyin ölkənin inkişafına heç bir fayda vermir. Onun sözlərinə görə, hökumətin elmi islamlaşdırmaq cəhdləri uğursuzluğa düçar olub.
“Maşının əlcək qutusuna (bardaçok) Quran qoymaqla həmin maşın islam maşını olmur”, – deyə o əlavə edib.
Dövlət televiziyası ilə canlı yayımlanan çıxışda Ruhani onu da əlavə edib ki, elmi “islami” və “qeyri-islami”yə ayırmaq düzgün deyil:
“Hər hansı elmin izahını Quranda və ya dində axtarmaq, elmlərin mənbəyini dini postulatlarla əlaqələndirməyə çalışmaq düzgün deyil”.
İranın məhkəmə sisteminin rəhbəri ayətulla Sadeq Amoli Larijani isə prezident Rouhani-nin bu çıxışını sərt tənqid edərək, onun bu fikirlərini “bayağı” adlandırıb.
Dini mühafizəkarlar hələ də mədrəsələrin ölkənin elmi ehtiyaclarını ödəyə, Qərb tipli universitetləri əvəzləyə biləcəyi fikrində israrlıdırlar.
