Respublika Narkoloji Mərkəzində bu gün baş verən yanğın 25 nəfərin həyatına son qoyub. Bəs bu hadisə ilə bağlı matəm elan olunmalıdır, yoxsa, yox?
Qanunvericilikdə ölkədə matəm olunması halları, bunun detalları ilə bağlı xüsusi müddəa yoxdur. Baş vermiş hər hansı faciə, insan itkisi ilə əlaqədar matəm elan etmək qərarı həmişə ölkə prezidenti tərəfindən verilib.
Qanunvericilikdə buna aid maddə olmadığından matəm elan olunması normativi də bəlli deyil. Hansı hadisə, nə qədər sayda insan itkisinə görə matəm elan etmək lazım olduğu qeyd olunmur.
Məsələn, 2015-ci il dekabrın 4-də Dövlət Neft Şirkətinin (SOCAR) “Günəşli” yatağındakı 10 saylı dərin dəniz özülündə baş vermiş yanğın və qəza nəticəsində ölkədə 1 günlük matəm elan olunmuşdu. Yanğın nəticəsində 30-dan çox adam itkin düşüb, 1 nəfər isə həlak olub.
Həmin ilin may ayında Binəqədi rayonu ərazisində çoxmərtəbəli binada baş verən yanğında isə 15 nəfər həlak olsa da ölkədə matəm elan olunmamışdı.
Millət vəkili Zahid Oruc Mikroskop-a açıqlamasında qeyd edib ki, bu məsələ hansısa qanunla tənzimlənmir, amma son hadisə də daxil olmaqla matəm elan olunmaması daha çox şokun dalğasını cəmiyyətə ötürməmək məqsədi daşıyır:
Hər halda bütün ictimai iaşə müəssisələrinin normal iş ahəngini dəyişdirmək özü də xeyli vətəndşamızı suallar qaşısında qoyacaqdı. Eləcə də sərt tədbirlər bir sıra dövləttədbirlərinin da təxirə salınmasına səbəb olacaqdı.
Millət vəkili hesab edir ki, bu barədə qanun qəbul etmək və reqlamentləşdirmə aparmaq olar.
Matəm elan olunarsa, media nəyə riayət etməlidir?
“Reklam haqqında” Qanunun 20-ci maddəsinə görə, əgər ölkədə matəm elan olunubsa, teleradio proqramlarında reklamların efirə getməsi qadağandır.
“Günəşli” yanğınına görə 2015-ci ildə elan olunmuş matəm zamanı da bəzi televiziyalar bu qanunu pozmuşdu və Milli Televiziya və Radio Şurası onlara xəbərdarlıq etmişdi.
