Milli Şura və Müsavat Partiyasının martın 10-da keçirdiyi mitinqdən öncə həbs olunan fəalların sayı açıqlanıb. Azərbaycan Xalq Cəbhəsi Partiyasından bildirilib ki, Rəyasət Heyətinin üzvü Aqil Məhərrəmli, Xətai şöbəsinin üzvü Tahir Ağayev, Binəqədi şöbəsi sədrinin müavini Yalçın Abdullayev, şöbənin üzvü Hikmət Əliyev 15 sutka, Xətai rayon şöbəsi sədrinin müavini Faiq Nağıyev, Binəqədi şöbəsinin üzvü Bəşir Tarverdiyev 20 sutka azadlıqdan məhrum ediliblər.
MeydanTV-nin xəbərinə görə, martın 9-da gecə saatlarında AXCP Nəsimi şöbəsinin fəalı Baba Suleymanı da həbs ediblər, lakin 1 gecə saxlayıb, səhəri, aksiyadan sonra sərbəst buraxıblar.
Müsavat Partiyasının başqanı Arif Hacılı mitinq ərəfəsində 50-dən çox adam polis şöbələrinə çağırılıb:
Təkcə Cəlilabad rayon şöbəsinin 11 üzvü yerli polisin təzyiqinə məruz qalıb. O cümlədən, Xaçmaz, Quba və digər rayonlardan olan üzvlərimiz təzyiq altında olub. Ancaq inzibati cəza alan olmayıb.
NİDA-nın isə 20-yə yaxın üzvü polis şöbələrinə çağrılıb, yaxud sahə müvəkkili tərəfindən mitinqə getməməklə bağlı xəbərdarlıq alıblar. Hərəkat üzvlərindən sutkalıq cəza alan yoxdur.
