Gürcüstanın Azərbaycanda səfərdə olan baş naziri Giorgi Kvirikaşvili prezident İlham Əliyevlə görüşüb. APA-nın məlumatına görə, təkbətək görüşdə G.Kivrikaşvili iki ölkə arasındakı ticarət dövriyyəsindən danışıb və bildirib ki, bu, ilbəil artır.
Azərbaycan Gürcüstana investisiya yatıran ölkələr arasında birinci yerdədir
İ. Əliyev Gürcüstan hökumət başçısının Azərbaycana səfərinin iki ölkə arasında münasibətlərin inkişafına töhfə verəcəyini deyib:
Biz müxtəlif sahələrdə uğurla əməkdaşlıq edirik. Şadam ki, ticarət dövriyyəsi artır. Azərbaycan Gürcüstana investisiya yatıran ölkələr arasında birinci yerdədir və 2012-ci ildən bu mövqeyi saxlayır. Bu, sizin ölkədə investisiya mühitinin yaxşı olmasının göstəricisidir. Bu həmçinin bizim əlaqələrin yüksək səviyyədə olduğunu göstərir. Hər iki ölkənin iştirak etdiyi qlobal əhəmiyyətli layihələrdən danışan İlham Əliyev deyib ki, Cənub Qaz Dəhlizi və TANAP layihələrinin də reallaşması əməkdaşlığı daha yüksək səviyyəyə yüksəldəcək.
Sözügedən qlobal əhəmiyyətli layihələrdən danışan G.Kivrikaşvili onların iqtisadi və geosiyasi əhəmiyyətindən danışıb və vurğulayıb ki, qlobal formatlarda Gürcüstan hər zaman Azərbaycanın mövqeyini dəstəkləyir və bu strateji tərəfdaşlığa əsaslanır.
Baş nazir Azərbaycan prezidentini birinci respublikanın elan olunmasının 100 illik yubileyi münasibətilə təbrik edib:
Bu tarix Gürcüstan və Azərbaycan üçün əhəmiyyətlidir və ümid edirəm ki, biz bu tarixi layiqincə qeyd edəcəyik.
