“İran 2017-ci ildə Azərbaycana 3.1 milyard ABŞ dolları investisiya yatırıb”. Bunu Azərbaycanın İranda səfərdə olan iqtisadiyyat naziri Şahin Mustafayev deyib.
AzadlıqRadiosu xəbər verir ki, nazir İranın iqtisadi işlər və maliyyə naziri Məsud Kərbasian ilə görüşündə vurğulayıb ki, iki ölkə arasəndakı ticarət dövriyyəsi 2017-ci ildə 16 faiz artıb.
Ş.Mustafayevin sözlərinə görə, Azərbaycanda sənaye, tikinti, xidmət, rabitə, ticarət, nəqliyyat, kənd təsərrüfatı sahələrində 700-dən çox İran şirkəti qeydiyyatdan keçib.
O həmçinin vurğulayıb ki, İranın iştirakı ilə Azərbaycanda reallaşdırılan avtomobil istehsalı zavodunda işlər tamamlanmaq üzrədir. Bundan başqa Pirallahı Sənaye Parkında əczaçılıq zavodunun yaradılması üzrə işlər gedir. Ş.Mustafayev deyib ki, həmin zavod da İranla birgə yaradılır.
Görüşdə «Azərbaycan Dəmir Yolları» QSC-nin sədri Cavid Qurbanov və Naxçıvan Muxtar Respublikasının iqtisadiyyat naziri Famil Seyidov da iştirak ediblər.
