Türkiyənin qanunverici orqanı Türkiyə Böyük Millət Məclisi “Seçkilər və Seçicilərin Qeydiyyatı üzrə Təməl Qaydalar haqqında” Qanuna təklif edilən dəyişiklikləri qəbul edib. Türkiyə mətbuatı xəbər verir ki, ötən axşamdan başlayan və bu gün səhərə qədər davam edən müzakirələr nəticəsində qəbul edilən dəyişikliklər Ali Seçki Komissiyasına (YSK) yeni vəzifə və səlahiyyətlər verib.
Ali Seçki Komissiyası seçkinin növünə uyğun olaraq seçici sayını müəyyən edə bilər
Ali Seçki Komissiyası seçkinin təhlükəsiz şəraitdə keçirilməsi məqsədilə vali və yaxud bölgənin seçki komissiyasının sədri səsvermə günündən ən geci 1 ay əvvəl müraciət edərsə, həmin bölgədəki seçki qutularını ən yaxınlıqdakı seçki məntəqəsinə daşınmasına, seçki bölgələrinin birləşdirilməsinə, bələdiyyə seçkiləri istisna olmaqla digər seçkilər zamanı seçki bölgələrini birləşdirib seçici siyahılarının qarışıq şəkildə yazılmasına qərar verə bilər.
Komissiya xəstə və ya hər hansı fiziki məhdudiyyəti olan seçicilərin bələdiyyə seçkiləri istisna olmaqla səs verməsini təmin etmək üçün səyyar seçki məntəqəsi yaratmaq, səs vermək, səsləri saymaq və protokola daxil etməklə bağlı qaydaları müəyyən edə bilər.
Qanuna dəyişikliklər bununla kifayətlənməyib. Adı çəkilən qanunda “Seçki qutusu komissiyası sədrinin seçilməsi” başlığı ilə yazılan maddə “Seçki qutusu komissiyası sədrinin müəyyən edilməsi” başlığı ilə dəyişidirilir. Həmin şəxsləri rayon seçki komissiyalarının sədrləri müəyyən edəcək.
Birlikdə keçiriləcək prezident və parlament seçkilərində seçki bulletenləri eyni zərfə qoyulacaq.
Dəyişikliyə əsasən bundan sonra təkcə komissiya sədrləri yox, seçicilərin də xəbərdarlığı ilə təhlükəsizlik qüvvələri seçki məntəqəsinə gələ biləcək.
Cümhuriyyət Xalq Partiyasından (CHP) olan millət vəkilləri isə hesab edir ki, təhlükəsizlik qüvvələrinin seçki məntəqəsinə daxil olmağına icazə vermək səsvermə nəticələrinin daha qeyri-şəffaf şəraitdə hesablanması üçün istifadə oluna biləcəyini deyib.
