Almaniyada koalisiya hökumətinin qurulması ilə bağlı bazar ertəsi günü razılaşma imzalanıb. 177 səhifəlik koalisiya razılığı Xristian Birlik Partiyası (CDU/CSU) və Sosial Demokrat Partiyaları (SPD) arasında imzalanıb.
“Deutsche Welle” anlaşmada müzakirə mövzusu olan bəzi məsələlər haqqında qeyd olunanları açıqlayıb.
Mühacirlər və ailə birləşməsi: Partiyalar arasında əldə olunan razılığa görə, ailəsini yanına gətirmək istəyən mühacirlər üçün aylıq 1000 nəfərlik yetərsay müəyyən edilib. Bundan başqa il ərzində qəbul ediləcək mühacir sayı 180-220 min arası müəyyən edilib.
Avropa: Razılıqda partiyalar Avropa Birliyində islahatların vacibliyini vurğulayır. Yeni hökumət Avropa Birliyi büdcəsinə daha çox fayda verəcəyini qeyd edir və “büdcə intizamı”nın da vacibliyini bildirir.
Türkiyə: Anlaşmada qeyd olunur ki, Avropa Birliyinin genişlənməsindən daha çox, ciddiliyə önəm veriləcək. Türkiyənin “Almaniyanın vacib tərəfdaşı” və “Avropa Birliyinin qonşusu” kimi adlandırıldığı mətndə həm də o da qeyd olunur ki, bu ölkədə demokratiya, hüquq dövləti və insan haqları uzun müddətdir ki, pisləşməkdədir. Buna görə də Türkiyənin Avropa Birliyinə üzvlüyü məsələsində yeni bir mərhələ başlamayacaq. Eyni zamanda Türkiyə tələb olunanlara əməl etmədiyi müddət ərzində vizasız gediş-gəliş təşkil olunmayacaq və gömrük əməkdaşlığı genişləndirilməyəcək.
Səudiyyə Ərəbistanı ilə silah ticarəti: Koalisiya razılığında qeyd olunur ki, Almaniya hökuməti Yəməndəki müharibədə iştirak edək ölkərə silah ixrac etməyəcək.
Əmlak: Koalisiya tərəfdaşları Almaniyada 2022-ci ilə qədər 1.5 milyon yeni yaşayış binaları inşa edəcək. Hazırkı statistik məlumatlara görə, bu rəqəm ildə sadəcə 280 mindir.
Qlifosat: Kənd təsərrüfatında istifadə olunan bu kimyəvi maddə ilə bağlı koalisiya onun qadağan olunması razılığını əldə edib. Bu kimyəvi maddənin son illər Avropada çoxlu sayda böcəyin ölümünə səbəb olduğu hesab edilir.
