Daxili İşlər Nazirliyi Baş Dövlət Yol Polisi İdarəsi nəqliyyat vasitələrinə texniki baxışın keçirilməsi ilə bağlı müraciət edib. APA-nın məlumatına görə, müraciətdə bildirilir ki, Baş Dövlət Yol Polisi İdarəsi istehsal ili 2007-ci ilədək (2007-ci il daxil olmaqla), 2009-cu, 2011-ci və 2013-cü illər olan bütün növ mexaniki nəqliyyat vasitələrinin texniki baxışı davam edir.
Müraciətdə qeyd olunur ki, texniki baxışa görə aprel ayında yarana biləcək sıxlığın qarşısını almaq üçün Baş DYP İdarəsinin Bakı şəhəri Sabunçu rayonu Maştağa qəsəbəsində yerləşən texniki müayinə mərkəzi həftənin bütün günləri, eləcə də bayram günlərində də fasiləsiz işləyəcək.
Nəqliyyat vasitələrini texniki baxışa təqdim edəcək sürücü və ya sahiblərdən xahiş olunur ki, baxış zamanı əlavə vaxt itkisinə yol verilməməsi üçün cərimələrin ödənilməsini təmin etdikdən sonra müraciət etsinlər.
İnzibati Xətalar Məcəlləsinə görə, nəqliyyat vasitəsini dövlət qeydiyyatından və ya texniki baxışdan keçirmədən idarə etməyə görə fiziki şəxslər 50 manat, vəzifəli şəxslər 100 manat, hüquqi şəxslər isə 300 manat cərimələnir.
