Bu gün Daxili İşlər Nazirliyində aprelin 11-də baş tutacaq prezident seçkilərində ictimai asayişin mühafizəsi ilə bağlı Kollegiya iclası keçirilib. Daxili işlər naziri Ramil Usubov iclasda qeyd edib ki, seçkidə 5 milyondan artıq vətəndaşın iştirakı gözlənir və onların təhlükəsizliyinin, asayiş qorunması üçün “Tədbirlər planı” hazırlanıb, təsdiq edilib.
Baş İctimai Təhlükəsizlik İdarəsinin rəisi, polis general-mayoru Oqtay Kərimov çıxışında bildirib ki, daxil olan məlumatların vaxtında yoxlanması üçün xüsusi işçi qrup, Bakı Şəhər Baş Polis İdarəsində isə xüsusi operativ qrup yaradılıb.
O.Kərimov əlavə edib ki, həm təbliğat-təşviqat mərhələsində, həm də seçki günü polis əməkdaşlarının etik davranış qaydalarına riayət etmələri məsələsi də diqqətdə saxlanılır. Nazirlik Mərkəzi Seçki Komissiyası ilə birlikdə hazırladığı 11 min “Yaddaş kitabçası”nı şəxsi heyətə paylayıb.
Onun sözlərinə görə 12 mindən çox polis əməkdaşı gücləndirilmiş iş rejimində xidmət edəcək, dairə və məntəqə seçki komissiyalarının mühafizəsini təmin edəcək. Onlar həmçinin bütün zəruri xüsusi və digər vasitələrlə tam təchiz olunur.
Təbliğat-təşviqat kampaniyasının keçirildiyi yerlər və səsvermə günü seçki məntəqələrinin ətrafı “Təhlükəsiz şəhər” sisteminin müşahidə kameraları ilə fasiləsiz izlənəcək, bütün hüquqazidd hərəkətlərə dərhal reaksiya veriləcək. Polis seçki bülletenləri dairə və məntəqə seçki komissiyalarına daxil olduğu andan dairə və məntəqələri də 24 saat mühafizə edəcək.
Nazir Ramil Usubov çıxışında bir sıra tövsiyə və tapşırıqlar verib. O bildirib ki, Prezident seçkiləri zamanı ictimai asayişin təmi edilməli, vətəndaşlarla təmasda hər zaman nümunəvi davranış qaydalarına ciddi riayət edilməli, əməkdaşların fiziki, döyüş və peşəkar hazırlıq səviyyəsi daha da yüksəldilməlidir.
Nazirin müvafiq orqanların rəhbərlərindən tələbləri:
- Prezidentliyə namizədlərin və onların nümayəndələrinin təbliğat-təşviqat apardıqları, yığıncaq və toplantı keçirdikləri yerlərdə ictimai asayişin etibarlı mühafizə olunması
- Təxribatların və neqativ halların qarşısının operativ şəkildə alınması
- Seçki komissiyalarının, habelə seçki bülletenlərinin, səsvermə protokollarının və digər sənədlərin etibarlı mühafizəsinin təşkili
- Seçki gününədək səsvermə hüququ olanların müvafiq sənədlərlə tam təmin olunması
- Etibarlılıq müddəti bitmiş vəsiqələrin dəyişdirilməsi
- Səyyar qrupların işinin daha da sürətləndirilməsi
