Bu il keçiriləcək prezident seçkilərində iştirak edən namizədlərin təbliğat üçün İctimai Televiziyadakı ödənişsiz efirin yayım saatı və namizədlərə çıxış üçün verilən dəqiqə sayı dəyişdirilib. APA-nın xəbərinə görə, MSK sədrinin müavini bildirib ki, ötən seçkilərdən fərqli olaraq, namizədlərin istəyi nəzərə alınıb, İctimai Televiziyada efir vaxtı saat 19.00-dan saat 22.00-a dəyişdirilib. İctimai Radioda isə dəyirmi masalar saat 19.00-da təşkil ediləcək.
Seçki Məcəlləsinin tələbinə uyğun olaraq, həftədə 3 saat İctimai Televiziya, 3 saat İctimai Radio olmaqla, ümumilikdə 6 saatlıq ödənişsiz efir vaxtı ayrılacaq.
Hər namizəd hər Dəyirmi Masada 7 dəqiqə 30 saniyə çıxış edəcəklər.
Bundan başqa püşkatma yolu ilə namizədlərin çıxış edəcəkləri siyahı da müəyyənləşib.
Namizədlər İctimai Televiziya və İctimai Radioda dəyirmi masalarda aşağıdakı ardıcıllıqla çıxış edəcəklər:
1 – Öz təşəbbüsü ilə namizədliyi irəli sürülən Zahid Oruc
2 – Azərbaycan Sosial Demokrat Partiyası tərəfindən namizədliyi irəli sürülən Araz Əlizadə
3 – Bütöv Azərbaycan Xalq Cəbhəsi Partiyası tərəfindən namizədliyi irəli sürülən Qüdrət Həsənquliyev
4 – Yeni Azərbaycan Partiyası tərəfindən namizədliyi irəli sürülən İlham Əliyev
5 – “Cəbhəçilərin təşəbbüs qrupu” adlı təşəbbüs qrupu tərəfindən namizədliyi irəli sürülən Razi Nurullayev
6 – Azərbaycan Demokrat Partiyası tərəfindən namizədliyi irəli sürülən Sərdar Cəlaloğlu
7 – Milli Dirçəliş Hərəkatı Partiyası tərəfindən namizədliyi irəli sürülən Fərəc Quliyev
8 – Müasir Müsavat Partiyası tərəfindən namizədliyi irəli sürülən Hafiz Hacıyev
