ABŞ Senatı 2017-ci il oktyabrın 1-dən başlayan 2018-ci maliyyə ili üçün federal büdcə layihəsini təsdiqləyib.
APA TASS-a istinadən yazır ki, büdcə qanununda Rusiya təsiri ilə mübarizə və ABŞ seçki sisteminin müdafiəsinin gücləndirilməsi üçün vəsait ayrılıb.
Bir sıra dövlət qurumlarına Rusiya təsiri ilə mübarizə məqsədilə azı 250 milyon dollar ayrılması nəzərdə tutulub. Bu məbləğ “Avropa, Avrasiya və Mərkəzi Asiyaya yardım”, “Xarici hərbi yardım” və digər başlıqlar üzrə ayrılacaq.
TASS yazır ki, seçki sisteminin müdafiəsinin gücləndirilməsi üçün dövlət qurumlarına qrantlar şəklində 380 milyon dollar veriləcək. Rusiyanın kiberhücumları ilə mübarizə üçün isə Federal Təhqiqatlar Bürosuna (FBİ) 307 milyon dollar ayrılıb. Rusiyanın əsas silah şirkəti – “Rosoboroneksport”la əməkdaşlıq və hər hansı digər əlaqələrə qoyulmuş qadağa uzadılıb.
1,3 trilyon dollarlıq büdcə layihəsi Trampın imzalamasından sonra qüvvəyə minəcək.
