Facebook sosial şəbəkəsinin yaradıcısı Mark Zukerberq İngiltərə qəzetlərinə üzrxahlıq mesajı göndərib. NTV Türkiyə xəbər verir ki, həmin mesaj son vaxtlar Facebookda istifadəçilərin şəxsi məlumatlarının ələ keçirilməsi və təhlükəsizliyin tam təmin olunmaması ilə bağlıdır.
Facebook rəhbəri üzrxahlıq mesajında vurğulayıb ki, istifadəçilərin məlumatlarını qorumaq onların məsuliyyətidir və əgər bunu edə bilmirlərsə, həmin məlumatlara da layiq deyillər.
“Yəqin ki, universitetdəki bir araşdırmaçının hazırladığı və 2014-cü ildə milyonlarla insanın Facebookdakı məlumatlarını oğurlamağa imkan verən test barədə məluamtınız var. Bu, təhlükəsizliyin pozulması idi və bununla bağlı daha çox şey edə bilmədiyimə görə çox heyfislənirəm. Çalışırıq ki, belə hadisə yenidən təkrarlanmasın” – deyə M.Zurkerberq bildirib.
“Cambridge Analytica” şirkətinin 50 milyon Facebook hesabından əldə etdiyi gizli məlumatlar 2016-cı il ABŞ prezident seçkiləri və İngiltərədəki Brexit referendumunda ictimai rəyə təsir etmək üçün istifadə olunub. Bu faktın ortaya çıxmasından sonra bu sosial şəbəkə əleyhinə #deleteFacebook kampaniyası başlayıb və Facebook`un səhmləri düşüb. Şirkətin sahibi Mark Zukerberq son bir həftə ərzində 60 milyard dollar pul itirib.
