Amerika Birləşmiş Ştatları 60 rus diplomatını ölkəsindən çıxarır. Bu diplomatlardan 48-i Rusiyanın Vaşinqtondakı səfirliyində, digərlər isə Birləmiş Millətlər Təşkilatının Nyu-Yorkdakı mərkəzində işləyənlərdir.
NTV Türkiyə xəbər verir ki, ABŞ həmçinin Rusiyanın Sietldakı konsulluğunu da bağlamaqla bağlı qərar qəbul edib.
Rus diplomatları ölkədən çıxaran təkcə ABŞ deyil, eyni zamanda Kanada da 4 diplomatın ölkədən çıxarılacağını bəyan edib. İngiltərəyə dəstək olan daha bir neçə Avropa Birliyi ölkəsi, o cümlədən Almaniya da oxşar addımı atıb.
Avropa Birliyi Şurasının sədri Donald Task deyib ki, 14 AB ölkəsi rus diplomatlarını ölkədən çıxaracaq. Almaniya 4, Ukrayna 13, Çexiya 3, Polşa 4, Hollandiya 2, İtaliya 2 və Latvia da 1 rus diplomat barədə belə qərar qəbul edib.
ABŞ-ın qərarına Rusiyanın da cavabı gecikməyib. Belə ki, Rusiya 60 amerikalı diplomatı ölkəsindən qovacağını bəyan edib. Rusiya Xarici İşlər Nazirliyi NATO və Avropa Birliyi ölkələrinin rus diplomatları qovmalarına ciddi etiraz etdikərini açıqlayıb.
Bu diplomatik böhranın yaranmasına səbəb isə keçmiş rus agenti Sergey Skripal və qızının İngiltərədə restoranlardan birində sinir qazı ilə zəhərlənməsidir.
