Həbsdə olan jurnalist Əziz Orucovun səhhətində ciddi problemlər yaranıb. Bu barədə məlumatı onun həyat yoldaşı Lamiyə Orucova bildirib. Qeyd edib ki, jurnalist ondan növbəti görüşdə lazimi dərmanları gətirməsini xahiş edib.
“Bu gün Eziz bəylə telefonla danışdım. Səhhətində ciddi problemlər yaranıb. Böyrəyinin ağrıları artıb, bu da təyziqinin qalxmasına səbəb olub.Bu azmış kimi ürəyində də problemlər yaranıb. Sol qolunda uyuşmalar olduğunu, döşqəfəsində kəskin küt ağrıların artdığını dedi. Xahiş etdi ki, növbəti görüşdə ona lazımı dərman preparatları gətirim”.
- Kanal13 internet televiziyasının rəhbəri Əziz Orucov 2017-ci ilin 2 may tarixində polisə müqavimət ittihamı ilə saxlanılaraq 30 sutka inzibati həbs edilib.
- Azadlığa buraxıldığı gün Baş Prokurorluğun Ağır Cinayətlərə Dair İşlər üzrə İstintaq İdarəsində barəsində cinayət işi başlanıb. O, qanunsuz sahibkarlıq və vəzifə səlahiyyətlərindən sui-istifadə etmə maddələri ilə ittiham edilib
- Jurnalist 15 dekabr 2017-ci ildə Bakı Ağır Cinayətlər məhkəməsinin hökmü ilə 6 il azadlıqdan məhrum edilib.
