İntihara cəhd etməsi barədə xəbər yayılan “Nardaran məhbusu” Sahil Rzalının atası Xalid Rzayev martın 30-da Penitensiar Xidmətin rəhbərliyi ilə görüşüb. Azadlıq Radiosu xəbər verir ki, məhbusun atası hansı vəzifəli şəxslə görüşdüyünü açıqlamaq istəməyib və bildirib ki, görüşdən razı qalıb.
“Belə məsləhət oldu ki, ad çəkməyim. Rəhbərliklə görüşdüm, məni çox yaxşı qəbul elədilər, dinlədilər. Oğlumun həyatı ilə bağlı narahatlığımı çatdırdım. Ərizəmi aldılar. Əmin elədilər ki, iki gün ərzində məsələni araşdırıb, hansısa problem varsa, yoluna qoyacaqlar. Mən də onlara inanıram”, – X.Rzayev bildirib.
Martın 29-da onun saxlandığı 15 Saylı Cəzaçəkmə Müəssisəsində intihara cəhd etməsi xəbəri yayılıb. Atası xəbəri dəqiqləşdirməkdən ötrü müəssisəyə gedib oğlu ilə görüşmək istəsə də, ona S.Rzalının qaydaları pozduğuna görə cərimə kamerasına salındığı bildirilib.
- “Müsəlman Birliyi” Hərəkatının üzvü olan S.Rzalı 5 noyabr 2015-ci ildə təşkilatın sədr müavini Elçin Qasımovun həbsi ilə əlaqədar Sabunçu Rayon Polis İdarəsinin qarşısındakı etiraz aksiyasında iştiraka görə həbs olunub.
- O, Cinayət Məcəlləsinin 233-cü (İctimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) və 315-ci (hakimiyyət nümayəndəsinə qarşı müqavimət göstərmə və ya zor tətbiq etmə) maddələri ilə 6 il 5 ay azadlıqdan məhrum edilib.
