“Çudo Peçka” və “ÇP Aqro” MMC-nin təsisçisi Çingiz Cəlilov “Bank Standard” QSC-yə vurulan ziyanın bir qismini ödəyib.
Bunu APA-ya onun oğlu Anar Cəlilov deyib. Bildirib ki, Çingiz Cəlilov özünə məxsus Xaçmaz rayonunda yerləşən 37 hektar torpaq sahəsi 38 min manata sataraq, ziyandan ödəyib.
Baş Prokurorluğun mətbuat xidmətinin yaydığı məlumata görə, istintaq-əməliyyat tədbirləri ilə məlum olub ki, “Çudo Peçka” və “ÇP Aqro” MMC-lərinin təsisçisi Çingiz Cəlilov “Bank Standard” QSC Kommersiya Bankının İdarə Heyətinin sədri olmuş Səlim Krimanla əlbir olaraq bankdan pul mənimsəyib. Ç.Cəlilov 21 milyon 874 min manat məbləğində krediti bankın Müşahidə Şurasının razılığı olmadan dəyəri süni olaraq artıq qiymətləndirilmiş əmlakları girov qoymaqla rəsmiləşdirib. Rəsmiləşdirmə onun özünün, yaxın qohumlarının və qohumluq münasibətində olduğu, eləcə də rəhbərlik etdiyi cəmiyyətlərdə işləyən ayrı-ayrı şəxslərin adlarına guya bağ evinin alınması, mənzil təmiri, torpaq alınması və bu kimi digər təyinatlarla baş tutub.
Daha sonra qeyd olunan kredit müqavilələri əsasında banka guya külli miqdarda kredit borcu olduğu görüntüsü yaradıb və bir neçə dəfə restrukturizasiya (kreditin və ya onun ödənilməsi şərtlərinin dəyişdirilməsi) etdirib. Bununla da mənimsədiyi 13 milyon 962 min manat pul vəsaitini Səlim Krimanla öz aralarında bölüb.
Ç. Cəlilovun qeyd edilən kredit məbləğlərini öz qulluq mövqeyindən istifadə etməklə şəxsi ehtiyaclarına xərcləməsində şübhələr yarandığından ona Cinayət Məcəlləsinin 179.3.2 (külli miqdarda mənimsəmə və ya israf etmə, yəni təqsirkara etibar edilmiş özgə əmlakını talama) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə ittiham elan olunub və barəsində məhkəmənin qərarı ilə həbs qətimkan tədbiri seçilib.
