Ukraynada korrupsiya araşdırmaçıları Liviyanın keçmiş lideri Müəmmar Qəddafinin ukraynalı Yuliya Timoşenkonun 2010-cu ildəki prezident seçkisi kampaniyasına milyonlarla dollar ianə verməsi iddialarını araşdırırlar. Reuters İnformasiya Agentliyi xəbər verir ki, bunu ukraynalı deputat Volodimr Ariev deyib.
Timoşenko bu iddiaları rədd etsə də keçmişdə baş tutan qeyri-leqal maliyyələşmə hesabatları prezident seçkiləri ərəfəsində onun imicinə ziyan vura bilər.
V.Ariev bildirib ki, o və digər parlamentarilər Ukraynanın Milli Anti-Korrupsiya Bürosundan ərəb qəzetlərində nəşr olunan bu iddiaları araşdırmağı tələb ediblər.
“Aşraq əl-Avsat” qəzetinin yazdığına görə, Qəddafinin nümayəndəsi Timoşenkonun məğlubiyyəti ilə nəticələnən 2010-cu il seçki kampaniyasına 4 milyon avro ianə vermək üçün xüsusi təyyarə ilə Kievə uçub.
Ariev Facebook sosial şəbəkəsində anti-korrupsiya bürosunun onların müraciətini qəbul etməsi barədə məktubun da fotosunu paylaşıb.
Ukrayna qanunvericiliyinə görə, parlament üzvlərinin müraciəti dövlət orqanları tərəfindən araşdırılmalıdır.
- Timoşenkonunun partiyasının sözcüsü isə bu iddiaların əsassız olduğunu deyib.
- Timoşenko iki dəfə baş nazir olub və keçmiş prezident Viktor Yanukoviç onu həbs etdirib. Özünün milli saç düzümü ilə tanınan Timoşenko 2014-cü ildə də prezident seçkilərində məğlub olub, amma son rəy sorğularına görə, onun reytinqi artıb.
- Ukraynada növbəti prezident seçkiləri 2019-cu ilin martında baş tutacaq.
- 2007-2010-cu illərdə, Timoşenkonun baş nazir olduğu dönəmdə rəsmi Kiev və Tripoli arasında bir çox kommersiya müqavilələri imzalanıb.
