Aprelin 11-nə təyin edilən növbədənkənar prezident seçkiləri ilə əlaqədar Mərkəzi Seçki Komissiyası (MSK) və dairə seçki komissiyaları tərəfindən akkreditə olunmuş müşahidəçilərin sayı açıqlanıb.
APA yazır ki, bu günə qədər 60 təşkilat və 59 ölkədən 890 beynəlxalq müşahidəçi seçkiləri izləmək üçün akkreditə olunub.
Akkreditə olunmuş yerli müşahidəçilərin sayı isə 58 min 175 nəfərdir.
Aprelin 10-da isə prezident seçkiləri ilə bağlı seçkiqabağı təşviqat başa çatır.
Seçki Məcəlləsinə əsasən qeydə alınmış namizədlər, onların səlahiyyətli nümayəndələri və vəkil edilmiş şəxsləri, namizədi qeydə alınmış siyasi partiyalar, siyasi partiyaların blokları, onların səlahiyyətli nümayəndələri və vəkil edilmiş şəxsləri tərəfindən seçkiqabağı təşviqat səsvermə gününə 23 gün qalmış başlanır və səsvermənin başlanmasına 24 saat qalmış dayandırılır.
Seçkiqabağı təşviqat martın 19-u başlayıb, aprelin 10-u saat 08.00-da dayandırılacaq.
Azərbaycanda keçiriləcək olan növbədənkənar prezident seçkilərində 8 nəfər mübarizə aparacaq. Yeni Azərbaycan Partiyasından İlham Əliyev, Azərbaycan Sosial Demokrat Partiyasından Araz Əlizadə, Bütöv Azərbaycan Xalq Cəbhəsi Partiyasından Qüdrət Həsənquliyev, Milli Dirçəliş Hərəkatı Partiyasından Fərəc Quliyev, Müasir Müsavat Partiyasında Hafiz Hacıyev, “Cəbhəçilərin təşəbbüs qrupu”ndan Razi Nurullayev, Azərbaycan Demokrat Partiyasından Sərdar Cəlaloğlu və öz təşəbbüsü ilə namizədliyi irəli sürülən Zahid Oruc növbəti 7 ildə prezident olmaq üçün yarışacaqlar.
