51 saylı Qusar seçki dairəsində vətəndaşlar səs vermək üçün növbəyə dayanıb. Foto: Azərtac
Seçkini müşahidə edən müstəqil jurnalistlər və müşahidəçilər növbəti pozuntu halları qeydə alıb. İnsan Haqları İnstitutunun rəhbəri Nicat İmran bildirib ki, 6 saylı Culfa-Babək seçki dairəsi, 17 saylı seçki məntəqəsində hərbi formada Dövlət Sərhəd Xidmətinin işçiləri seçkidə iştirak edib. Saat 08:20-08:30 radələrində onların məntəqədə olduğu müşahidə olunub. Eyni saatlarda oxşar hala 7 saylı Ordubad-Culfa seçki dairəsi, 6 saylı seçki məntəqəsində də rast gəlinib.
İnstitutun yaydığı məlumata görə, 08:30 radələrində 8 saylı Binəqədi seçki dairəsi, 9 saylı seçki məntəqəsində isə “karusel” müşahidə olunub. Seçicilər kütləvi halda məntəqəyə daxil olub. 10 saylı Binəqədi III seçki dairəsi, 6 saylı məntəqədə də bənzər hal müşahidə olunub.
MDB müşahidə missiyasının rəhbəri, MDB İcraiyyə Komitəsinin sədri, MDB-nin icraçı katibi Sergey Lebedev isə seçkilərin mütəşəkkil və sakit keçdiyini deyib. Report xəbər verir ki, S.Lebedev müşahidələr zamanı heç bir anlaşılmazlıq və ya pozuntunun qeydə alınmadığını deyib.
“Azərbaycanda seçki qanunvericiliyi və seçkilərin özü demokratik azad seçkilərin ümumi qəbul edilmiş normalarına uyğundur”, – deyə S.Lebedev bildirib.
Mərkəzi Seçki Komissiyası növbəti iki saata olan seçki nəticələrini açıqlayıb. Məlumatda qeyd olunur ki, 39.39% seçici səsvermədə iştirak edib. MSK Katibliyinin Seçkilər İnformasiya Mərkəzinin müdiri Fərid Orucov deyib ki, 5 milyon 314 min 365 seçicidən 2 milyon 93 min 343 nəfəri səsvermə hüququndan istifadə edib.
