“Missiya üzvü dedi ki, Stefan Krause artıq hesabatı hazırlayıb və seçkinin səhərisi açıqlanacaq”

ATƏT-in Demokratik Təsisatlar və İnsan Haqları Bürosunun (ATƏT DTİHB) seçkiləri müşahidə missiyasının siyasi məsələlər üzrə köməkçisi Vüqar Əhmədov tutduğu vəzifədən istefa verib. Bu barədə o özü bu gün keçirdiyi mətbuat konfransında bəyan edib. APA xəbər verir ki, Vüqar Əhmədov həmin qurumu 11 aprel seçkiləri ilə bağlı qeyri-obyektiv və qərəzli mövqe ortaya qoymaqda ittiham edib.

O, hesabatın əvvəlcədən hazırlandığını və missiya rəhbərinin müavini Stefan Krause ilə ünsiyyətdə onun Azərbaycana mənfi münasibətini şəxsən müşahidə etdiyini deyib: “Missiyanın digər üzvü Eqol Tilpunov ilə də danışdım, o isə dedi ki, pozuntuların olacağı əvvəlcədən məlum idi. Ondan soruşdum ki, bunu haradan bilirsiniz? Dedi ki, “məndə əvvəlcədən məlumat var və bizdə hesabat artıq hazırdır”. Sonra da əlavə etdi ki, Stefan Krause artıq hesabatı hazırlayıb və seçkinin səhərisi açıqlanacaq. Mən yenə soruşdum ki, seçkilər hələ olmayıb, ancaq sizdə hesabat artıq hazırdır? O bildirdi ki, Krause əvvəllər də Azərbaycanda olub və hər şeyi bilir. Bütün bunlar ondan xəbər verir ki, bu şəxslər nəyi müşahidə etmələrindən asılı olmayaraq qərəzli hesabat təqdim edəcəklər və çox təəssüf ki, elə də oldu”.

V.Əhmədov iddia edib ki, seçki günü o da ofisdə olub və kütləvi, ciddi qanun pozuntularının qeydə alındığınə görməyib. Onun sözlərinə görə, qurumun hesabatına missiyanın bəzi üzvləri etiraz edib və həmin şəxslər missiyadan kənarlaşdırılıb, geri göndəriliblər.

“Mən də bunların heç bir ilə barışmadığım üçün rəsmi şəkildə müşahidə missiyasının rəhbərinə müraciət etdim və missiyanı tərk etdim. Müşahidə missiyası anti-Azərbaycan mövqeyində olan, erməni dairələrinin maraqlarına xidmət edən insanların təsiri altında idi” – deyə V.Əhmədov əlavə edib.