Məzahir Pənahov ATƏT-in Azərbaycan xalqına hörmət etməsini tələb edir

Mərkəzi Seçki Komissiyasının sədri Məzahir Pənahov ATƏT Demokratik Təsisatlar və İnsan Haqları Bürosu, ATƏT Parlament Assambleyası (ATƏT PA) və Avropa Şurası Parlament Assambleyasının (AŞPA) prezident seçkilərinin nəticələri ilə bağlı yaydıqları hesabata münasibət bildirib. APA-nın məlumatına görə, MSK sədri bildirib ki, adıçəkilən qurumlar Azərbaycana layiq olmadığı standartları tətbiq edirlər:

“Seçkilərdə xoşagəlməz addımlar atmaq istəyən insanlar da ola bilər. Azərbaycanda seçkinin səviyyəsi ən inkişaf etmiş ölkələrdəki səviyyəyə uyğundur. Onlar bizi məcbur edirlər ki, fikir bildirək. Azərbaycan xalqı onların fikirləşdiyi xalq deyil, biz Azərbaycan xalqına hörmət tələb edirik. Bu seçki onların xoşuna gələn ölkələrdə keçirilsəydi, axşama qədər təbliğ edərdilər. Bizə təsir edən odur ki, niyə bizə layiq olmadığımız standartlar tətbiq olunur? Ortaya qoyduqları sənədə baxanda görürük ki, missiyanın özü seçki müşahidə missiyasından daha çox başqa missiyaya xidmət edən qurum kimi görünür”.

Komissiya sədri əlavə edib ki, prezident seçkilərində iştirak edən namizədlər ona zəng edib və seçkinin təşkili ilə bağlı razılıqlarını bildiriblər.

“Prezident seçkiləri Azərbaycan tarixinə yazılan ən uğurlu səhifələrdən biridir” – deyə M.Pənahov əlavə edib