Milli Məclisin Mədəniyyət komitəsinin bu gün keçirilən iclasında “Kütləvi informasiya vasitələri haqqında” qanuna əlavələr müzakirəyə çıxarılıb. APA xəbər verir ki, əlavələrə görə, hərbi vəziyyət dövründə “Hərbi vəziyyət haqqında” qanuna müvafiq olaraq KİV-in məlumat və materialları hərbi senzuradan keçirilə, habelə hərbi vəziyyət tətbiq edilən ərazidə (ərazilərdə) KİV-in xüsusi fəaliyyət rejimi tətbiq oluna bilər.
Əlavə də həm də KİV-in azadlığının müvəqqəti məhdudlaşdırılması da yer alıb. Bu, hərbi vəziyyətin qüvvədə olduğu müddətdə şərtləri və bu şərtlərin həyata keçirilməsi qaydası göstərilməklə baş tuta bilər.
Komitənin iclasında eyni zamanda “Televiziya və radio yayımı haqqında”, “Telekommunikasiya haqqında” və “Tarix və mədəniyyət abidələrinin qorunması haqqında” qanunlara əlavələr müzakirəyə çıxarılıb.
Bu əlavələr də hərbi vəziyyətlə bağlıdır.
Belə ki, təklif olunan layihələrə əsasən fövqəladə və hərbi vəziyyət şəraitində rabitədən istifadə üçün xüsusi qaydaları müvafiq icra hakimiyyəti orqanı müəyyən edəcək. Hərbi vəziyyət şəraitində qanunvericiliyə uyğun olaraq səlahiyyətli dövlət hakimiyyəti orqanları zəruri telekommunikasiya şəbəkələrinin, qurğularının və vasitələrinin istifadəsində üstünlük hüququna malikdirlər və onların istifadəsini dayandıra, məhdudlaşdıra və ya rabitdədən istifadə üçün xüsusi qaydalar tətbiq edə bilərlər.
Əlavələrə görə, hərbi vəziyyətlə əlaqədar olaraq daşınar abidələr onların məhv edilməsi, oğurlanması və ya korlanması təhlükəsi qarşısında qanunvericiliklə müəyyən edilmiş qaydada müvəqqəti olaraq təhlükəsiz rayonlara köçrülə bilər. Digər əlavəyə əsasən hərbi vəziyyət dövründə “Hərbi vəziyyət haqqında” müvafiq olaraq teleradio məlumat və materialları hərbi senzuradan keçirilə, habelə hərbi vəziyyət tətbqi edilən ərazidə (ərazilərdə) teleradio yayımının xüsusi fəaliyyət rejimi tətbiq edilə bilər.
Layihələr Milli Məclisin plenar iclasına tövsiyə olunub.
