Türkiyənin Milliyyətçi Hərəkat Partiyasının sədri Dövlət Baxçalı növbədənkənar Prezident və Parlament seçkiləri keçirilməsi təklif edib. Partiya sədri bu təklifi Türkiyə Böyük Millət Məclisinin komitə iclasında səsləndirib. Siyasətçi təklif edir ki, hər iki seçki 2018-ci il avqustun 26-da keçirilə bilər.
Foto: Utku Uçrak / AA
NTV Türkiyə xəbər verir ki, siyasətçi bu təklifini belə əsaslandırıb:
“Prezidentlik sistemi rəsmi şəkildə reallaşmadan mütəmadi olaraq ittiham olunur və ona ziyan dəyir. Türkiyə bu yükün altında daha çox qalıb 2019-cu il 3 oktyabra qədər səbr edə bilməz, bu, mümkün və uyğun deyil”.
Partiya sədri hesab edir ki, seçki müddətinə təsir edən əsas səbəblərdən biri Türkiyənin regional və beynəlxalq münasibətləri və bunların sosial, siyasi və hərbi sahədəki təsirləridir. Digər səbəb isə iqtisadi göstəricilər və hökumətin bununla bağlı atacağı addımlardır.
“Prezident sisteminə keçid milli sabitlik baxımından təcili ehtiyaca çevrilib. 2019-cu il martın 31-də yerli özünü idarələrin seçkisi olacaq. Bundan 7 ay 3 gün sonra isə Prezident və Parlament seçkiləri baş tutacaq. Siyasi təqvim belədir. Amma yerli özünü idarə seçkilərindən sonra Türkiyənin nə ilə üzləşəcəyini proqnozlaşdırmaq çətin deyil. Bu seçkidən sonra yaranacaq qütbləşmə və anlaşılmazlıqlar 3 oktyabr seçkilərinə necə təsir edəcəyini hamımız bilirik” – deyə D.Baxçalı vurğulayıb.
Sabah Dövlət Baxçalının prezident Rəcəb Tayyib Ərdoğanla görüşü planlaşdırılır.
