Bu ilin 3 ayı ərzində Azərbaycanda doğuş zamanı 7 ana ölümü baş verib

Bu il baş verən ana ölümləri ilə bağlı 12 nəfərə töhmət verilib, 1 nəfər həbs edilib.

APA-nın məlumatına görə bunu baş mama-ginekoloq Sevinc Məmmədova bildirib.

S. Məmmədova qeyd edib ki, 2017-ci ildə 20 ana ölümü faktı qeydə alınıb, 50-dən çox tibb işçisi barəsində inzibati tənbeh tədbiri görülüb.

2018-ci ilin 3 ayı ərzində isə Azərbaycanda 7 ana ölümü baş verib.

S. Məmmədova həm də əlavə edib ki, hamilə qadınlar xəstəliklərini, adətən, həkimlərdən gizlədirlər. Hamilə qadınların xəstəlikləri əvvəldən bilinsə, onlara göstərilən tibb xidmət daha keyfiyyətli olar. Baş mama-ginekoloq Azərbaycanda hamilə qadınlar arasında əsasən anemiya, böyrək və ürək xəstəliklərinə rast gəlindiyini də vurğulayıb.

O, 2017-ci ildə Azərbaycanda icra edilən abortların sayını da açıqlayıb. 2017-ci ildə Azərbaycanda 37 618 abort olduğunu deyən Məmmədova abortların əsasən 18-25 yaşlı qadınlar üzərində icra edildiyini bildirib. O əlavə edib ki, abortdan sonra ölüm halı baş verməyib.

Ötən il təxminən 18 yaşına çatmayan 5-ə yaxın qadın abort edib.