Azərbaycanın ərazi bütövlüyü uğrunda həlak olan, və hərbi əməliyyatlarla əlaqədar xəbərsiz itkin düşdüyünə görə ölmüş hesab edilən hərbi qulluqçuların vərəsələrinə 11 min manat məbləğində bir dəfəlik ödəmə veriləcək. Bu, prezident İlham Əliyevin imzaladığı fərmanda qeyd olunub. Hərbi qulluqçuların dövlət icbari sığortası əsasında veriləcək ödəniş 1997-ci il avqustun 2-ə qədər ölən və itkin düşən hərbçilərin vərəsələrinə veriləcək.
Fərmana əsasən birdəfəlik ödəmə Mülki Məcəlləyə uyğun olaraq müəyyən edilən vərəsələrə Əmək və Əhalinin Sosial Müdafiəsi Nazirliyi tərəfindən veriləcək.
Ödəmə şəxsin müraciəti və aşağıdakı sənədlər əsasında verilir:
- hərbi qulluqçunun ölümü haqqında şəhadətnamə;
- hərbi qulluqçunun ölmüş elan edilməsi haqqında məhkəmə qərarı;
- birdəfəlik ödəməni almaq üçün müraciət etmiş şəxsin vərəsəlik hüququnu təsdiq edən sənəd;
- birdəfəlik ödəməni almaq üçün müraciət etmiş şəxsin bank hesabı nömrəsinə dair arayış.
Birdəfəlik ödəmə həqiqi hərbi xidmətdə (toplanışda) olduğu zaman həlak olması, ölməsi və ya xəbərsiz itkin düşdüyünə görə ölmüş elan edilməsi ilə əlaqədar əvvəllər sığorta ödənişi verilməmiş, o cümlədən barəsində sığorta ödənişinin verilməsinə dair qanuni qüvvəyə minmiş məhkəmə aktı olmayan hərbi qulluqçuların vərəsələrinə verilir.
