İngiltərə RT telekanalının fəaliyyəti barədə 8 təhqiqat aparacaq

Rusiya dövləti tərəfindən maliyyələşdirilən RT-nin tərəfsizlik prinsipinə riayət edib-etməməsi məsələsi nəzərdən keçirilir.

Beləki RT xəbər kanalının İngiltərədə zəhərlənmiş keçmiş Rusiya casusu Sergey Skripal və onun qızı Yuliya haqqında hazırlanan proqramlar Britaniyada medianı tənzimləyən hökumət qurumu tərəfindən 8 ayrıca təhqiqat aparılacaq.

Media tənzimləyicisi Ofcom aprelin 18-də xəbərdarlıq edib ki, RT-nin proqramlarını hazırlayan TV Novosti şirkəti Britaniyada yayın hüququndan məhrum edilə bilər.

Ofcom-un bəyanatında deyilir ki, TV Novosti son vaxtlaradək xəbər yayınında başqa yayınçılardan çox da fərqlənməyən reportajlar versə də, Solsberidə baş vermiş zəhərlənmə insidentindən sonra Britaniyanın yayın qaydalarını kobud şəkildə pozmağa başlayıb.

Britaniya martın 4-də Skripal və qızının zəhərlənməsinə görə Rusiyanı ittiham edir. Moskva isə bu insidentlə hər hansı əlaqəsinin olmadığını deyir.