Ermənistanda hakimiyyət əleyhinə keçirilən aksiyalar ölkə sərhədlərindən kənarda da davam edir. Ötən gün Ermənistanın Gürcüstandakı səfirliyi qarşısında, bu gün isə Avropa Şurası Parlament Assambleyası qarşısında aksiya keçirilib.
“Mikroskop” xəbər verir ki, parlamentin qarşısına 300-400 nəfər toplanıb. Onlar baş nazir Serj Sarkisyanı diktator adlandırıb və aksiyalara liderlik edən Nikol Paşinyanı dəstəklədiklərini bildiriblər.
Ermənistanda aksiyalar aprelin 10-da, Serj Sarkisyanın prezidentlik müddətinin başa çatdığı gündən etibarən başlayıb. Əhali parlament idarəçilik sistemində Serj Sarkisyanın baş nazir kimi ölkəni yenidən idarə etməyini istəmir. Buna baxmayaraq parlament Serj Sarkisyanı baş nazir seçib.
Aksiyalara liderlik edən Nikol Paşinyan ötən gün baş nazirlə görüşsə də bu, cəmi 3-4 dəqiqə davam edib və nəticəsiz qalıb.
