Əfqan Muxtarlı barədə 6 illik həbs hökmü qüvvədə qalıb
Gürcüstandan oğurlanaraq Azərbaycana gətirilən jurnalist Əfqan Muxtarlının bu gün Apelyasiya Məhkəməsi keçirilib. Balakən rayon Məhkəməsinin 6 illik həbs qərarından verilən appelyasiya şikayətinə Şəki Apellyasiya Məhkəməsi baxıb. Jurnalistin şikayəti təmin edilməyib. Məhkəmədə zərərçəkmiş qismində çıxış edən gizir Qafur Məmmədovun istintaqa verdiyi ifadə ilə məhkəmədəki ifadə üst-üstə düşməyib. Bu da jurnalistlə onun arasında mübahisəyə səbəb olub.
Daha iki vəkilin fəaliyyətinə xitam verilib
Nemət Kərimli və Əsabəli Mustafayevin vəkillik fəaliyyətinə 1 illik xitam verilib. Əsabəli Mustafayev bildirib ki, qərar Baş Prokuroluqdan Vəkillər Kollegiyasına keçən ilin oktyabrında daxil olan şikayət əsasında qəbul olunub. Şikayət baş prokurorun birinci müavini Rüstəm Usubov tərəfindən verilib. Hər iki vəkil cinayət işlərini “siyasiləşdirməkdə” təqsirli bilinir. Nemət Kərimli jurnalist Əfqan Muxtarlının, Əsabəli Mustafayev isə AXCP-nin sədr müavini Gözəl Byaramlının cinayət işini “siyasiləşdirməkdə” günahkar sayılır. Vəkillər bu qərardan məhkəməyə şikayət etməyi planlaşdırır.
Rusiya prezidentinin sözcüsü Ermənistandakı hadisələri şərh edib
Rusiya prezidentinin mətbuat katibi Dmitri Peskov Ermənistandakı hadisələrə münasibət bildirib. Peskov oradakı vəziyyətin Ukrayna ilə müqayisəsinin düzgün olmadığını vurğulayıb: “Ermənistandakı situasiyanı Ukraynada baş vermiş dövlət çevrilişi ilə müqayisə etmək yersizdir. Mən bu hadisələr arasında paralellər aparmazdım. Ona görə ki, vəziyyət tamamilə fərqlidir”. İrəvanda baş verənlərin ölkənin daxili işi olduğunu vurğulayan mətbuat katibi deyib ki, Kreml bu ölkədə sabitliyin qorunub saxlanmasına və siyası konsensusun əldə olunmasına ümid edir.
