“Sərbəst toplaşmaq azadlığı haqqında” qanuna dəyişiklik edilməsi təklif edilir

Azərbaycan prezidenti “Sərbəst toplaşmaq azadlığı haqqında” qanuna dəyişiklik edilməsi üçün Milli Məclisə təklif göndərib.

APA yazır ki, İlham Əliyev tərəfindən təklif olunan layihədə qanunun 8-ci (Toplantının qadağan edilməsi və ya dayandırılması) maddəsinin VIII (Fövqəladə vəziyyətin qüvvədə olduğu müddət ərzində onun tətbiq edildiyi ərazidə yığıncaqların, mitinqlərin, nümayişlərin, küçə yürüşləri və piketlərin keçirilməsinə Fövqəladə vəziyyət haqqında müəyyən edilmiş qaydada məhdudiyyət qoyula bilər və ya onların keçirilməsi qadağan edilə bilər) hissəsində “Fövqəladə” sözündən sonra “və ya hərbi” sözləri əlavə edilir, eyni zamanda ““Fövqəladə vəziyyət haqqında” qanunla müəyyən edilmiş qaydada” sözləri ““Fövqəladə vəziyyət haqqında” və “Hərbi vəziyyət haqqında” qanunlara uyğun olaraq” sözləri ilə əvəzlənir.

Layihənin Milli Məclisin mayın 1-də və 4-də keçiriləcək ardıcıl plenar iclaslarından birində müzakirəyə çıxarılacağı gözlənilir.