AŞPA Azərbaycanla bağlı korrupsiya hesabatını 123 səslə qəbul etdi
Bu gün Avropa Şurası Parlament Assambleyasında (AŞPA) Azərbaycandan rüşvət almaqda şübhəli bilinən üzvlərlə bağlı hazırlanan hesabatın müzakirəsi keçirilib. 219 səhifəlik hesabat 123 səslə qəbul edilib. 9 nəfərin əleyhinə səs verdiyi hesabat 10 ay ərzində hazırlanıb və bir çox deputatın Azərbaycandan bahalı hədiyyələr qəbul etdiyi qeyd olunur. Heabatda deyilir ki, Avropa Şurası Parlament Assambleyasının (AŞPA) bir neçə üzvü Azərbaycana münasibətdə etika qaydalarını pozub, “korrupsiya xarakterli” fəaliyyətə yol verib.
Hüseyn Abdullayevə yeni ittihamlar irəli sürülüb
Baş Prokurorluq, Vergilər və Daxili İşlər nazirlikləri Hüseyn Abdullayevin həbsi ilə bağlı birgə məlumat yayıb. O, vergidən yayınma maddəsindən başqa, dələduzluq, hədə-qorxu ilə tələb etmə və eyni əməllərin xeyli miqdarda əmlak əldə etmək məqsədi ilə törədilməsi maddələri ilə də ittiham ediləcək. Yeni ittihamlar “Autist Uşaqların Reablitasiyasına Kömək” İctimai Birliyinin sədri Elnur Məmmədovun şikayəti əsasında elan edilib. Elnur Məmmədov iddia edir ki, keçmiş deputat onu və ailəsini təhqir edib və hədə-qorxu ilə ondan hər ay 6 min manat pul ödəməsini tələb edib.
“Sərbəst toplaşmaq azadlığı haqqında” qanuna dəyişiklik edilməsi təklif edilir
Azərbaycan prezidenti “Sərbəst toplaşmaq azadlığı haqqında” qanuna dəyişiklik edilməsi üçün Milli Məclisə təklif göndərib. Layihədə təklif olunur ki, qanunun 8-ci maddəsinin VIII hissəsində “Fövqəladə” sözündən sonra “və ya hərbi” sözləri əlavə edilsin. Layihə qəbul olunarsa, yığıncaqlar, mitinqlər, nümayişlər, küçə yürüşləri və piketlərin keçirilməsi təkcə fövqəladə vəziyyət yox, eyni zamanda hərbi vəziyyətin də qüvvədə olduğu müddətdə məhdudlaşdırıla bilinəcək.
