Türkiyə Ali Seçki Şurasının prezident və 27-ci çağırış Türkiyə Böyük Millət Məclisi seçkiləri ilə bağlı hazırladığı təqvim planına görə, namizədlik üçün müraciətlər sabahdan etibarən başlayacaq. NTV Türkiyə xəbər verir ki, prezidentliyə namizədlər 5 may saat 17:00-a qədər, seçicilər tərəfindən namizədliyi irəli sürülənlər isə 2 may saat 17:00-a qədər Ali Seçki Şurasına müraciət edə bilər.
Bu həftə ərzində siyasi partiyaların prezidentlik üçün kimləri namizəd göstərdiyi bəlli olacaq.
Seçicilər tərəfindən namizədliyi irəli sürülənlər tələb olunan 100 min imzanı 4-9 may tarixlərində toplamalıdır.
Namizədlərin müvəqqəti siyahısı mayın 10-da Rəsmi Qəzetdə dərc olunacaq. Dəqiqləşdirilmiş rəsmi siyahı 13 mayda dərc olunandan sonra təşviqat kampaniyası dönəmi başlayacaq.
Hakim Ədalət və İnkişaf Partiyasının, Milliyyətçi Hərəkat Partiyası və BBP ilə birlikdə yaratdığı “Cumhur ittifaqı” blokunun namizədi hazırkı prezident Rəcəb Tayyib Ərdoğandır.
Ana müxalifət Cümhuriyyət Xalq Partiyasının namizədi hələ ki, bəlli deyil.
Xalqların Demokratiya Partiyası (HDP) namizədlərinin adını mayın 4-ü açıqlayacaqlarını bəyan edib.
Yeni yaranan İYİ Partinin sədri Meral Akşener isə ona dəstək olmaq üçün partiyasına keçən CHP-dən olan 15 millət vəkilinin təklifi ilə yox, 100 min imza toplayaraq namizəd olacağını açıqlayıb.
