Əfv Komissiyası yüzədək müraciətə baxıb – gündəlik xəbərlər – 01.05.2018

Əfv Komissiyası yüzədək müraciətə baxıb
Mayın 1-də Azərbaycan Prezidenti yanında Əfv Məsələləri Komissiyasının iclasında yüzədək müraciətə baxılıb. Bunu Amerikanın Səsinə komissiyanın üzvü Əliməmməd Nuriyev bildirib.
O deyib ki, komissiyanın iclasları davam etdiriləcək.
Bundan öndəki iclaslarda komissiya əfvlə bağlı yüzlərlə müraciətə baxıb.
Azərbaycan Xalq Cümhuriyyətinin (AXC) 100 illiyi ərəfəsində əfv sərəncamının imzalanacağı gözlənilir.
Azərbaycan prezidenti sonuncu əfv sərancamını 2017-ci il martın 16-da imzalayıb və 423 nəfərə şamil olunub.

Türkiyədə partiyalar namizədlərinin adını açıqlayır
Türkiyədə daha bir siyasi partiya iyunun 24-də keçiriləcək növbədənkənar prezident seçkilərində iştirak edəcək namizədinin adını açıqlayıb. NTV Türkiyə xəbər verir ki, Səadət Partiyasından seçkidə partiyanın sədri Temel Karamollaoğlu namizəd olacaq.
Ana müxalifət partiyası Cümhuriyyət Xalq Partiyasının (CHP) sözcüsü Bülent Tezcan isə namizədlərinin kim olacağını mayın 4-ü yerli vaxtla saat 10:00-da açıqlayacaqlar.
“Cumhur ittifaqı” blokunun namizədi isə hazırkı president Rəcəb Tayyib Ərdoğandır.

Nikol Paşinyan baş nazir seçilə bilmədi
Ermənistan Parlamenti Yelk Partiyasının lideri Nikol Paşinyanın baş nazir postuna namizədliyinin əleyhinə səs verib. Current Time yazır ki, Nikol Paşinyan 45 lehinə, 55 səs isə əleyhinə almaqla baş nazir seçilə bilməyib.
Ermənistan Parlamentinin çoxluqda olan “Respublikaçılar” fraksiyası bir müddət əvvəl Paşinyanın əleyhinə səs verəcəklərini açıqlamışdılar. Həmin fraksiyada parlamentin 105 deputatından 58-i təmsil olunur.
Paşinyanın namizədliyini Parlamentdə cəmi 9 mandatı olan Yelk Partiyası irəli sürüb.
Baş nazir postuna ondan başqa namizəd olmayıb.