Həbsdə olan araşdırmaçı jurnalist Əfqan Muxtarlı Şüvəlandakı 3 saylı İstintaq Təcridxanasına etap edilib. Azadlıq Radiosu xəbər verir ki, bu barədə NİDA Vətəndaş Hərəkatından Samir Əsədli məlumat verib. Onun sözlərinə görə, məhkəməsi başa çatan jurnalist bir neçə gün həmin təcridxanada qalacaq.
Daha sonra jurnalistin Şüvəlandan cəzaçəkmə müəssisələrindən birinə göndəriləcəyi bildirilir. Bu günə qədər Ə.Muxtarlı Şəkidəki penitensiar mərkəzdə saxlanırdı.
Həbs olunana qədər Gürcüstanın paytaxtı Tbilisidə yaşayan jurnalist ötən il mayın 29-u oğurlanaraq Bakıya gətirilib. Daha sonra həbs olunan jurnalist Cinayət Məcəlləsinin (CM) 206 (qaçaqmalçılıq), 315 (hakimiyyət nümayəndəsinə zor tətbiq etmə) və 318-ci (dövlət sərhədini qanunsuz keçmə) maddələri ilə ittiham olunub. İddia olunur ki, Azərbaycan sərhədini qanunsuz keçən Ə.Muxtarlının üzərindən 10 min avro pul tapılıb. Onun sərhədi qanunsuz keçərkən hakimiyyət nümayəndəsinə zor tətbiq etdiyi də iddia olunur.
2018-ci il yanvarın 12-də keçirilən məhkəmədə o, 6 il azadlıqdan məhrum edilib.
